Манай багш, туслах багш нар биднийг байсан, байгаагүй хариуцсан ажлаа санаачилгатай, хариуцлагатай гүйцэтгэдэг. Энэ нь цэцэрлэгийн удирдлагаас тэдэнд итгэл өгч, бие даан ажиллах боломж олгодогийн үр дүн юм. Бид (эрхлэгч, арга зүйч) 2016 оны 3-4 дүгээр сард 20 гаруй хоног үндэсний сургагч багшаар аймгууд болон дүүрэгт ажиллан, цэцэрлэгээрээ орох завгүй байлаа.
Манайх нийслэлийн Баянзүрх дүүргийн 63 дугаар цэцэрлэг. Бид хүүхэд бүрийг хөгжүүлэх үзэл баримтлалдаа “Хүүхдийг бүтээлч үйлийн орчинд хөгжүүлнэ” гэж тусгасан. Иймд өдөр тутмын үйл ажиллагааны явцад хүүхэд нэг бүрийг хөгжүүлэхэд урлал, уран сайхан, бүтээлч үйл гол байр суурийг эзэлж байна.
Цэцэрлэгийн багш, ажилтнууд чийрэгжүүлэлтийн гишгүүрийг товч, бөглөө, даавуу, мяндсан тор, олс, шүр зэрэг янз бүрийн гарын доорх материал ашиглан хийж, хүүхэд бүрийг эрүүлжүүлж чийрэгжүүлэх үйл ажиллагаандаа хэрэглэж байна. Энд зарим жишээг харууллаа.
Бага насны хүүхдэд өөрийгөө тусгаарлах, ганцаараа байх сонирхол их байдаг. Бид тэдний ийм сонирхол хүслийг харгалзан нэгэн тоглоомын орчин бүрдүүлснээ мэргэжил нэгт нөхдөдөө танилцуулъя. Манай хүүхдүүд энэ тоглоомдоо маш дуртай, дотор нь орж өөрийнхөөрөө тоглоно, ном үзнэ, ганцаараа байна.
Бид цэцэрлэгийнхээ гадаах талбайд эцэг эхийнхээ тусламжтайгаар хүүхдэд сонирхолтой, тэдний хөдөлгөөнийг дэмжсэн олон тоглоом хийсэн. Тэдгээрээс аавуудын хийсэн, хүүхдүүдийн тоглох хамгийн дуртай хоёр тоглоомыг хэрхэн хийж, ашиглаж байгаагаа танилцуулъя.